Реализација на значајни инфраструктурни проекти во делчевската населба „Басарица“
Жителите на приградската населба „Басарица“ конечно добиваат решенија за еден од најголемите и најдолгогодишните проблеми со кои се соочуваа со децении – несоодветната инфраструктура и отежнатиот пристап до домовите.
Деновиве и официјално започнаа градежните работи за изградба на дел од улиците „Ветренска“ и „Света Троица“, во вкупна должина од околу 200 метри.
Прво подземна, па надземна инфраструктура
Според проектот, пред асфалтирањето и уредувањето на улиците, се поставува целосна и современа подземна инфраструктура. Ова опфаќа изградба на нова водоводна мрежа, фекална и атмосферска канализација, со што трајно ќе се надминат проблемите со водоснабдувањето и одводнувањето во овој дел од градот.
Гоцевски: Инвестираме во секое маало и решаваме реални проблеми
Градоначалникот на Општина Делчево, Иван Гоцевски, изврши увид во почетокот на градежните работи и порача дека со овој проект се отвора ново поглавје во развојот на „Басарица“.
„Во Басарица денес не започнуваме само со изградба на улици. Започнуваме со решавање на долгогодишен проблем и создавање услови за поквалитетен живот на жителите. Прво ја градиме инфраструктурата што не се гледа – нова водоводна мрежа, фекална и атмосферска канализација, а потоа и улиците што ќе обезбедат безбеден и соодветен пристап до домовите. Ова е конкретен пример дека рамномерниот развој на Делчево значи инвестиции во секој дел од градот и во секое маало,“ нагласи градоначалникот Гоцевски, додавајќи дека општината продолжува посветено да работи на проекти кои носат вистински придобивки за граѓаните.
Кои се изведувачи на работите?
- Подземна инфраструктура: Фирмата „ВОДВАР“ од Скопје.
- Изградба на улиците: Градежната компанија „Гама градба“ од Скопје.
Со реализацијата на овој зафат, жителите на „Басарица“ добиваат современ стандард на живеење и инфраструктура каква што доликува на урбана средина.
За авторот на оваа објава
