Честитка од градоначалникот на Делчево за сите матуранти
Градоначалникот на општина Делчево Иван Гоцевски денеска им ја честиташе матурата на сите матуранти кои што овој месец го завршуваат средното образование и продолжуваат кон нови успеси и предизвици во понатамошните животи.
“Почитувани матуранти,
Искрено ви ја честитам матурата и ви посакувам да патувате и да сонувате и да ги остварите вашите соништа и амбиции.
Чекорете во животот гордо и достоинствено како вечерва, освојувајте височини и не бегајте од предизвиците, туку претворете ги во можности.
Матурата е само почеток на нов период од вашиот живот. Верувам дека знаењето што сте го стекнале во делчевскиот средношколски училишен центар, го постави темелот за вашиот напредок, а пријателствата стекнати во ученичките клупи, ќе ви останат како аманет за едно другарство кое ќе ве следи целиот живот.
Никогаш не заборавајте ги водите на немирната Брегалница, Голак кој ве следи на секој чекор, делчевските улици, бидејќи тие се дел од вашиот идентитет. Тука се вашите први чекори и првите победи. Тука се вашите корени што ве изградиле во тоа што сте денес и тука е вашиот дом.
Среќно, драги матуранти, животот ве чека!”
-напиша на социјалните мрежи Градоначалникот Гоцевски.
За авторот на оваа објава
