Општина Делчево формира Совет за развој на туризмот: Нов пристап кон локалниот економски развој

Денеска во брифинг за медиумите и јавноста Градоначалникот на општина Делчево Иван Гоцевски најави формирање на нов локален Совет за развој на туризмот во Делчево. Оваа активност која што за првпат се воведува е дел од една поширока програмска активност за модернизација на пристапот за Локален економски развој на Делчево од еден поширок аспект и мултифункционалност со вклучување на сите расположиви релевантни капацитети за динамизирање на локалната економија во општината.

Туризмот како еден од клучните столбови на локалниот развој

“Општина Делчево започнува нова фаза во креирањето на локалните политики за економски развој преку воспоставување на Совет за развој на туризмот, тело кое ќе има задача да ги обедини институциите, стопанството и граѓанскиот сектор во насока на искористување на туристичките потенцијали на општината.”

-најави денеска Градоначалникот Гоцевски во својот брифинг до медиумите

Од локалната самоуправа истакнуваат дека уште од почетокот на мандатот биле направени детални анализи на состојбите во економијата и функционирањето на локалната администрација, при што било утврдено дека во минатото недостигала интегрирана и синхронизирана соработка помеѓу општинските служби, стопанството и останатите чинители во областа на локалниот економски развој.

Нов модел на соработка со граѓаните и бизнис секторот

Во изминатиот период општината работела на зајакнување на капацитетите на месните и урбаните заедници, со цел секое населено место да добие можност активно да учествува во креирањето на развојните политики.

Паралелно со тоа, воспоставени се нови механизми за соработка со стопанските субјекти и невладините организации, преку кои се реализираат активности насочени кон поттикнување на економскиот раст и развој.

Од Општина Делчево нагласуваат дека воведувањето на новите практики не секогаш наидува на поддршка, но дека остануваат цврсто посветени на отворањето на институцијата кон потребите на граѓаните и бизнис заедницата.

Потребни се нови политики за новите предизвици

Според локалната самоуправа, денешната улога на општините значително се разликува од онаа пред една или две децении. Глобалните економски и демографски предизвици бараат современ и динамичен пристап кон управувањето со локалниот развој и обезбедувањето економска одржливост.

Во таа насока, туризмот е препознаен како една од областите со најголем потенцијал за раст во Делчево.

Се формира Совет за развој на туризмот

Во завршна фаза е подготовката за конституирање на локалниот Совет за развој на туризмот на Општина Делчево.

“Советот ќе биде координиран од градоначалникот и службите задолжени за локален економски развој, а во неговата работа ќе бидат вклучени претставници од:

• НУЦК „Никола Јонков Вапцаров“ – Делчево;
• ЗФК „Копачка“;
• Фолклорна група „Вапцаров“;
• КУД „Гоце Делчев“;
• Планинарско-спортски клуб „Голак“;
• Здружението на пензионери;
• локалните медиуми;
• угостителскиот и хотелскиот сектор;
• транспортните компании;
• СОУ „Методи Митевски – Брицо“;
• Македонската православна црква;
• месните заедници, особено од руралните средини;
• Министерството за внатрешни работи и Граничната полиција;
• надворешни експерти и консултанти.”

-информира Градоначалникот Гоцевски.

Што е целта на Советот?

Основната задача на Советот ќе биде воспоставување на силна институционална платформа за развој на туризмот во Делчево, преку која ќе се обезбеди активно учество на сите релевантни чинители во процесот на креирање туристички политики.

Советот ќе работи на дефинирање на конкретни мерки, проекти и развојни приоритети, со јасно утврдени цели и мерливи индикатори за успех.

Клучни цели

Советот ќе работи на:

• развој на одржлив туризам во општината;
• подобрување на туристичката инфраструктура;
• промоција на природните, културните и историските богатства на Делчево;
• поттикнување на инвестиции во туристичкиот сектор;
• создавање нови можности за вработување;
• зголемување на бројот на домашни и странски посетители;
• подобрување на соработката помеѓу јавниот, приватниот и граѓанскиот сектор.

Со формирањето на Советот за развој на туризмот, Општина Делчево поставува нови темели за системски пристап кон развојот на туризмот, со амбиција овој сектор да стане еден од двигателите на локалниот економски раст во наредните години.

За авторот на оваа објава