Акција за превенција за безбеден сообраќај на граничниот премин кај Делчево кон Бугарија
Во рамки на кампањата ПАТУВАМЕ БЕЗБЕДНО на граничниот премин „Делчево“ се реализираше едукативно-превентивна активност за одговорно и безбедно учество во сообраќајот организирана од ОСБСП Делчево и Општина Делчево и во соработка со МВР — РЦ за ГР – Исток, МВР — ОВР Делчево, МВР — Отсек за превенција при СВР Штип и Црвен крст на РСМ – Општинска организација Делчево, а поддржана од Републичкиот совет за безбедност на сообраќајот на патиштата.
Во оваа едукативно-превентивна активност преку непосредни средби на возачите им беа потенцирани ризиците при патувањата за време на летниот период, им беа давани препораки за одговорно и безбедно учество во сообраќајот со поделба на флаери, додека од страна на волонтерите на Црвениот крст и медицинско лице на возачите на тешки товарни возила им беше мерен крвниот притисок, а на сите возачи им беше поделена вода за освежување поради високите температури.
Од страна на Општинскиот совет за безбедност на сообраќајот на патиштата Делчево и МВР до учесниците во сообраќајот за време на летниот период се апелира:
- Редовно да се проверува техничката исправност на возилата пред патување;
- На пат секогаш да се тргнува одморен;
- При подолги патувања на секои 2 часа да се прави пауза од најмалку 15 минути;
- Да се почитуваат сообраќајните правила и прописи;
- Да се вози смирено и толерантно кон другите учесници во сообраќајот.
Кампањата ПАТУВАМЕ БЕЗБЕДНО на ОСБСП Делчево се спроведува за време на летната туристичка сезона и претставува значаен дел од континуираните активности на ОСБСП Делчево за унапредување на сообраќајната култура и намалување на бројот на сообраќајни незгоди на подрачјето на Општина Делчево, преку едукација и превенција.
За авторот на оваа објава
