Ученици од СОУ “М.М.БРИЦО” твореа на ликовна колонија посветена на 150 годишнината од Разловечкото востание
Во организација на менаџментот на Средното општинско училиште “Методи Митевски Брицо” Делчево во текот на вчерашниот ден се реализираше Ликовна колонија посветена на 150 годишнината од Разловечкото Востание.
Ученици од училиштето под туторство на нивната професорка Лиле Георгиевска на сликарско платно со акрилни бои твореа уметнички дела со пејсажи од славното Разловци во чест на големиот јубилеј.
Уметничките штафелаи беа поставени на неколку локации од каде уметничката имагинација на младите уметници го зароби погледот на автентичните пејсажи и селска архитектура.
🎨 Денес нашите ученици, заедно со професорката по ликовна уметност Лиле Георгиевска, учествуваа на ликовна колонија во село Разловци, организирана по повод одбележувањето на 150 години од Разловечко востание.
Со својата креативност и талент, учениците дадоа прекрасен придонес во зачувувањето на историското и културното наследство. 🖌️🇲🇰
-напишаа на социјалните мрежи од СОУ “М.М.БРИЦО” Делчево во врска со овој настан.
Уметничките креации на учениците од делчевската гимназија ќе бидат поставени во рамки на Спомен домот на Разловечкото Востание кој во изминатиот период целосно се реконструираше а свечено ќе биде пуштен во употреба на 19 мај во рамки на централниот настан за одбележување на големиот јубилеј.
За авторот на оваа објава
