Сума:
loading...

„Оценки“, „досада“, „лоши наставници“, „добри наставници“, „шеги“, „другарчиња“, „учење, „домашни“ се некои од зборовите што прво им паѓаат на памет на учениците кога ќе помислат на училиште. Дали некаде ги прочитавте зборовите „знаење“, „уживање“ и „забава“? За жал, училиштето не асоцира на тие термини. За „уживање“ и „забава“ некако ќе прогледаме низ прсти, ама што правиме со зборот „знаење“ кој би требало да биде главната цел на сите училишта?

На прашањето „Дали сакате да одите на училиште?“, учениците одговараат со зачудувачко и едногласно „Да“. Но, некои од нивните образложенија за ваквиот одговор се дека сакаат да одат на училиште поради нивните другарчиња, затоа што тоа им е „работа“ и затоа што не знаат што би правеле во текот на целиот ден кога би седеле дома. Учениците не одат на училиште за да научат, за да стекнат знаења и да станат подобри личности, туку за да се видат со нивното друштво и да си го исполнат денот.

Сите сме свесни дека на македонскиот образовен систем му требаат реформи што ќе го подобрат и ќе му помогнат да ја оствари својата првична цел, а тоа е обезбедување знаење. Некои од најголемите проблеми со кои се соочува образованието во Македонија се немотивирани и фрустрирани наставници кои се однесуваат неправедно кон учениците, имаат свои миленици, не ставаат оценки по заслуга и не го пренесуваат знаењето на интересен и ефективен начин, потоа, несоодветни учебници по одредени предмети, лоши услови за работа (стари училници, скршени столчиња и клупи, тавани од каде што протекува вода и слично), како и преголемиот број на предмети што ги преоптоваруваат учениците и не им дозволуваат да се фокусираат она оние вештини што би сакале да ги развиваат.

Македонскиот образовен систем не може ни да се спореди со некои од најдобрите образовни системи во светот. На пример, Финска се смета за држава каде што образованието е на најзавидно ниво. Па, зошто е тоа така? Во Финска нема тестови (учениците прават само 1 тест во текот на нивното основно и средно образование), учениците речиси воопшто немаат домашни задачи, наставата е интердисциплинарна (предметите се поврзуваат помеѓу себе и се предаваат како целина, а не одделно) и факултетот е бесплатен. Слична е и ситуацијата во Швајцарија каде што учениците во средно училиште се делат според нивните способности и интереси, за да можат да се развиваат во една насока. Во Јапонија, пак, се посветува огромно внимание на манирите на учениците, кои мораат сами да си ги чистат училниците и да си ја готват храната.

Македонскиот образовен систем многу се разликува од најдобрите образовни системи во светот, се согласувате? Но, што мислат учениците? Какво би било идеалното училиште, според нив? Ние спроведовме кратка анкета на 15 ученици од 9-то одделение и втора година средно и дознавме како би изгледало училиштето од соништата…

Оценувањето би било описно

Повеќето ученици не се согласуваат дека бројките претставуваат соодветни оценки за нивното знаење, туку би сакале да бидат оценувани описно. Ова се практикува во некои приватни училишта, но во државните, идејава сѐ уште е само фантазија. Учениците објаснуваат дека описниот начин на оценување би им помогнал да разберат каде згрешиле, како би можеле да се подобрат, но и кои се нивните силни страни. Друга замисла што им се допаѓа на учениците е добивањето емотикончиња наместо оценки. На пример, единицата да се замени со луто човече, двојката со расплакано, тројката со индиферентно, четворката со благо насмеано, а петката со широко насмеано човече. Учениците сметаат дека би биле помотивирани да се борат насмевка, отколку за бројка.

Повеќе активности надвор од училиштето
Не е никаква тајна тоа дека учениците едвај чекаат да излезат од монотоните училници. Сите испрашани ученици се согласуваат дека би сакале да имаат повеќе активности надвор од училиштето кои би им помогнале подобро да го совладаат материјалот. На пример, кога учат за животни по биологија, тие би сакале да ја посетат зоолошката градина. Обработувањето на лектирите по македонски јазик би одело многу полесно кога учениците би погледнале како изгледаат книгите преточени во театарски претстави. Наставата во природа, кога времето е убаво, исто така звучи како одлична идеја!
Интелигентни, креативни, инспиративни и духовити наставници
Сетете се на вашиот омилен наставник или наставничка. Кои особини ги поседувале? Учениците ни открија дека идеалните наставници треба да бидат слободоумни, духовити, интелигентни, добродушни, креативни, инспиративни и комуникативни. Тие исто така посочија дека наставниците треба да бидат авторитативни за да можат да воведат дисциплина во класот, но не и строги. Некои ученици дури и би сакале наставниците да бараат многу од нив за да можат да го извлечат најдоброто од себе. Познавате вакви примери?
Воведување на предметите готвење и комуникациски вештини како задолжителни

Учениците сметаат дека важно е да научат да готват за да можат полесно да станат независни и самостојни. Тие чувствуваат дека оваа вештина им недостасува, а би им била од голема корист во иднина. Исто така, тие сметаат дека многу малку внимание се обрнува на нивните комуникациски вештини, па затоа би сакале да имаат предмет на училиште кој ќе биде посветен токму на тоа. На тој начин, тие не би имале проблем да говорат во јавност, но и би ги подобриле односите со луѓето околу нив.

Освен тоа, добра идеја би било да се воведат предмети како театар и креативно пишување. Учениците се согласуваат и дека јогата би им помогнала да се опуштат пред и по стресните тестови, што е навистина интересно сознание. Секако треба да се спомене дека одговорите на ова прашање зависеа од личните интереси на учениците, така што можеби најдобро би било секој да може да избере кој предмет би сакал да го учи како задолжителен во текот на целото образование, а не само во период од 1 година во средно училиште во зависност од изборот на насока.

По 15-25 ученици во секое одделение

Учениците се согласуваат дека 35 е голема бројка, но не би сакале да учат во одделение со помалку од 15 деца. Тие сметаат дека идеалната бројка на ученици во едно одделение е 15-25. На тој начин, тие ќе имаат можност да стекнат повеќе другарчиња, но и да чујат повеќе различни мислења кои претставуваат основа за добра дискусија и дебата. Премалку ученици е еднакво на досада, но премногу доведува до недисциплина и нарушена настава. Златната средина е најдоброто решение, се согласувате?

Домашна атмосфера во училниците

Изгледот на училниците во училиштата се нема сменето уште од самите почетоци на образованието. Учениците поминуваат половина од денот на неудобни, дрвени столчиња, наместени во редици еден позади друг, гледајќи во старата зелена табла која редно е да се замени со бела табла во сите училишта, а не само во некои. Да не зборуваме за уништените ѕидови, протекувањето од таванот, ужасните тоалети и прозорците со решетки. Училниците би требало да бидат удобни и топли, а не ладни и монотони. Учениците ни открија дека најпријатно се чувствуваат кога учат дома или во атмосфера што ги потсетува на домашната. Некои од нивните идеи се да се заменат столчињата со меки перничиња, да имаат поголеми тркалезни клупи кои ќе бидат наместени во круг наместо во редици. На тој начин, ќе можат полесно да соработуваат и да разменуваат идеи со соучениците. Ваквата атмосфера ќе им помогне да се чувствуваат удобно и повеќе да научат од часовите.

Повеќе проекти на теми што ги интересираат учениците

Наставниците честопати се загрижени дека нема да стигнат да го предадат целиот материјал, бидејќи е премногу обилен, а наставната програма е премногу набиена. Поради тоа, учениците немаат можност да се изразат и да ги истражуваат сопствените интереси. Тие постојано добиваат разни задачи, но ретко кога некоја од нив навистина им го задржува вниманието и им останува во сеќавање. Тие би сакале нивниот глас да биде чуен и да им се остави простор да прават проекти на теми што ги интересираат. Интересно е и тоа што учениците сметаат дека домашните задачи се неопходни за совладување на материјалот, па затоа не им пречи да ги извршуваат, сѐ додека се разумни и не вклучуваат премногу пишување.

Крај на неправдите и незаслужените оценки

Учениците најмногу се фрустрираат и разочаруваат кога ќе забележат дека наставниците имаат миленици. Тие многу се вознемируваат кога некои ученици добиваат подобри оценки од нив, иако вложиле помалку труд. Тоа прави да се чувствуваат гневно и им ја уништува мотивацијата. Наставниците треба многу да внимаваат на своето однесување и начин на оценување, бидејќи нивните зборови и постапки имаат огромно влијание на учениците. Професорската работа подразбира преземање голема одговорност и треба да се сфати многу сериозно. Доколку учениците се почувствуваат обесправени, не треба да се плашат да разговараат за тоа со некого и ако се во право, неопходно е да се стори нешто во врска со тоа прашање. Сепак, подобро е да се спречи отколку да се лечи, па затоа можеби добра идеја е наставниците да поминат низ посебни обуки и семинари што ќе им помогнат да станат посвесни за своето однесување и неговото влијание на учениците.

Сите овие промени звучат одлично во теорија, но многу е тешко да се применат во пракса. Целиот процес на реформи во образованието бара многу трпение, упорност, напор и внимателно размислување. Сведоци сме дека постојано се воведуваат некакви новитети, од кои повеќето се покажале како неуспешни. Тоа е така, затоа што при одлучувањето, надлежните забораваат да ги земат предвид мислењата на оние коишто се директно вклучени во образовниот систем.

Гласот на учениците не треба да биде нечуен и безначаен. Треба да им се остави простор да ги искажат своите ставови. Треба да бидат охрабрени да даваат свои идеи и предлози, бидејќи образованието нив најмногу ги засега. Гласот на учениците треба да влијае на конечните одлуки што се однесуваат на образованието, затоа што само така ќе се доближиме кон остварувањето на замислата за идеалното училиште од соништата.

За авторот на оваа статија:
Super Admin
Author: Super AdminWebsite: http://www.reevolucioner.blogspot.comEmail: Оваа е-адреса е заштитена од спамботови. Треба да ви е овозможено JavaScript за да ја видите.
Сопственик на порталот, администратор, развој на концепт, дизајнер, фотограф, автор на текстови.
Краток опис:
Катализатор за успешна реакција на котелот наречен современие.
Други најнови статии од авторот:

Наши пријатели

loading...
Go to top

Потребен е LIKE на нашата фејсбук страна